الكورت CORT لتنمية مهارات التفكير .. ماهو ؟؟

انهاردة حانتكلم عن برنامج الكورت cort لتنمية مهارات التفكير ..

في البداية يعني إيه كورت CORT؟؟

ال CORT هي كلمة مكونة من أوائل الحروف لثلاث كلمات بتكون جملة Cognitive Research Trust ودي اسم المؤسسة اللي أنشأها د. إدوارد ديبونو لتعليم التفكير وسمى البرنامج اللي صممه بنفس الاسم .

مين اللي صمم البرنامج ده ؟؟

صمم البرنامج ده طبيب مالطي " من مالطا" اسمه إدوارد دي بونو Edward DeBono اهتم بدراسة العمليات المعرفية عند الإنسان وأهمها طبعا التفكير وده كان بداية مجموعة كبيرة من البرامج والكتب المختلفة في التفكير ومهاراته ووهو من اكثر البرامج اسخداما حول العالم في تعليم التفكير بشكل مباشر فقد تم استخدامه من اكثر من 7 ملايين طالب حول العالم من المرحلة الإبتدائية لحد المرحلة الجامعية في اكثر من 30 دولة منها الولايات الأمريكية وانجلترا وكندا وماليزيا وبعض الدول العربية.

البرنامج ده بيتكون من إيه؟؟

بيتكون برنامج الكورت CORT من 6 أجزاء رئيسية كل جزء بيتكون من 10 أدوات والست أجزاء هي :

1- توسعة الإدراك Breadth

والجزء ده بمثابة حجر الأساس لكل الأجزاء الباقية لأنه بيوسع التفكير ويساعده على التركيز والعمق وانه ماينظرش للأمور بسطحية او من جهة واحدة ويحكم عليها بموضوعية .

2- التنظيم Organizing

وبيركز الجزء ده على تنظيم الأفكار وحل المشكلات Problem Solving Skills

3- التفاعل Communication

وهنا بنتعلم إزاي اتفاعل صح مع أفكار الآخرين نتعلم مهارات التواصل والتحاور والإقناع والتفاوض وبتعتمد بشكل كبير على مهارات التفكير الناقدCritical thinking

4- الإبداع Creativity

وبتعتمد على تعلم مهارات التفكير الإبداعيCreative Thinking والتفكير خارج الإطار المألوف .

5- المعلومات والمشاعر Information

وبنتعلم هنا إزاي نحصل على المعلومات بطريقة صحيحة ونقيمها ونفرق بين المعلومات والأفكار وبين المشاعر وإزاي ان مشاعرنا بتأثر بشكل كبير على نظرتنا للمعلومات وإزاي نحدد قيمنا ..
الجزء ده قائم على التفكير العلمي Science Thinking والوعي الذاتيSelf Awarness و الذكاء العاطفي Emotional Intelligence

6- العمل Action

وفي الجزء ده بنتعلم مهارات التخطيط وتحديد الأهداف والتصميم والتنفيذ ووضع الخطط البديلة وده قائم على التفكير التصميمي Design Thinking
________________________________
انهاردة أخدنا نظرة سريعة على برنامج الكورت وإن شاء الله في المرات القادمة نتكلم بعمق أكتر على أدوات التفكير داخل البرنامج ..انتظروونا ..

** اللي يحب يستزيد من المعلومات في الموضوع أكتر حاتلاقوا إني حطيتلكم المصطلحات بالعربي والإنجليزي لأن الكتابات في الموضوع ده بالعربي قليلة جدا ولا تقارن لو دورتوا بالإنجليزي ..

مستنية آراءكم واستفساراتكم على مقال انهاردة ..
#كورت_التفكير
#المفكر_الصغير
#مهارات_التفكير
#ارتق_بفكر_ترتق_بأمة